पुणे : स्नेहवर्धन प्रकाशनाने प्रकाशित केलेल्या डॉ. मधुरा कोरान्ने लिखित ‘न्यायालय आणि मराठी नाटक’ या विषयावरील पुस्तकाचे प्रकाशन ज्येष्ठ नाटककार सुरेश खरे यांच्या हस्ते नुकतेच पुण्यात झाले.
‘हे एका वेगळ्या विषयावरील पुस्तक आहे. आतापर्यंतच्या अनेक नाटकांमध्ये न्यायालयाची दृश्ये दाखवली जातात आणि तीच आपल्या मनावर ठसतात. स्वातंत्र्यानंतरच्या कालखंडातील पंचवीस नाटकांचा अभ्यास करून डॉ. कोरान्ने यांनी हे अभ्यासपूर्ण विवेचन केले आहे .एका वेगळ्या विषयाला त्यांनी स्पर्श केला आहे. डॉ. कोरान्ने या अभिनंदनास पात्र आहेत,’ असे उद्गार सुरेश खरे यांनी या वेळी काढले.
या कार्यक्रमात डॉ. गिरीश ओक यांनी ‘तो मी नव्हेच’ या नाटकातील लखोबा लोखंडे आणि डॉ. मानसी मागीकर यांनी ‘शांतता कोर्ट चालू आहे’मधील लीला बेणारे यांचे स्वगत सादर केले. अॅड. प्रमोद आडकर, निखिल कोरान्ने यांनीही या वेळी मनोगत व्यक्त केले. केतकी कुलकर्णी यांनी सूत्रसंचालन केले, तर डॉ. स्नेहल तावरे यांनी आभार मानले.